Зардап шеккен өрт сөндірушінің әйелі мемлекет сыйға берген пәтерге алғыс білдірді

Өрт сөндіруші Асқар Забикулиннің жұбайы Әнел үш бөлмелі пәтердің сертификаты үшін алғысын білдірді. Дегенмен пәтердің мұндай  жағдайда алынғаны жас келіншектің жүрегіне басу бола алмаған сияқты.

«Біз отбасымыздың атынан үлкен алғыс білдіреміз. Несін жасырамыз, біз, әрине, кез келген отбасы сияқты өз ұямызды армандайтынбыз. Бірақ біз оны бұндай бағамен алатынымызды елестете де алмадық. Мен үшін, біз үшін бұл мүлдем маңызды емес екенін бірден айтқым келеді. Бастысы күйеуімнің өмірі. Біз бәріне қол жеткізер едік! Күйеуім алдына мақсат қоятын, не болса да жететін адам. Оның ерлігін бағалағандарыңызға рахмет»  деп жазды келіншек Instagram парақшасында.

Еске салайық, 16 қарашада 15 қабатты үйдегі өрт кезінде өрт сөндірушілер Асқар Забикулин мен Аян Кемпіров адамдарды өрттен шығару кезінде қатты зардап шеккен болатын. Забикулин екінші және үшінші дәрежелі күйік алды, жасанды тыныс алу аппаратына қосылды.