Заңсыз кен өндіріп Ресейге сатқан Ұлытау тұрғыны сотталды

ҚР Қаржы мониторингі агенттігі «Шығыс Қаражал» карьерінен марганец кенін заңсыз өндіру және сату фактісі бойынша тергеу жүргізді. Ресейге кенді сатқан Ұлытау тұрғыны ұсталды, деп хабарлайды Orda.kz.

Айыпталушыда жер қойнауын пайдалануға келісімшарт та, лицензия да болмаған. 2020 мен 2023 жылдар аралықтарында заңсыз әрекетін жүзеге асырған. Ұрланған кен көлемі 16 мың тоннадан асты, мемлекетке 1,1 млрд теңгеден астам шығын келтірілді.

Алаяқ жалған мәмілелер жасап, ел ішінде және Ресейде қайта өңделген темір-марганец кендерін сату арқылы 3,5 млрд теңгеден астам табыс тапқан.

Сот айыпталушыны кінәлі деп танып, оны 6 жыл 8 ай бас бостандығынан айырды. Сондай-ақ, қылмыскерден 97,8 млн теңгеге 5 көлік пен шаруа қожалығындағы мүліктер тәркіленді. Сот үкімі заңды күшіне енген жоқ.