Заманбек Нұрқаділовке арналған ескерткіш орнатылды

Алматы облысының Кеген ауылында мемлекет және қоғам қайраткері Заманбек Нұрқаділовке арналған бюсттің салтанатты ашылуы өтті, деп хабарлайды Orda.kz.

«Бұл іс-шара президент Қасым-Жомарт Тоқаевтың бастамасы аясында ұйымдастырылды. Ол Нұрқаділовтің туған ауылында ескерткіш және Алматыдағы үйіне ескерткіш тақта орнатуды ұсынған болатын», – деп атап өтті Алматы облысының әкімдігі.

Шараға мемлекеттік қызметкерлер, қоғам қайраткерлері, ақындар мен жазушылар, сондай-ақ Нұрқаділовтің жақындары мен туыстары болды.

Ескерткішті Заманбек Нұрқәділовтің ұлы Қайрат ашты.

«Халқымыз әкем туралы тек жақсылық айтатын. Жылдың басында әкеміздің 80 жылдығына ас береміз дегенде, мемлекет басшысы Қасым-Жомарт Тоқаев хат жолдады. Хатында әкемнің еңбегін қолдап, «тұратын үйіне тақта қойыңдар, бюст қойыңдар, өнер мектебіне атын беріңдер» деп тапсырма берген. Бүгін біз соның куәсі болып отырмыз. Мектеп ашылды. Ішінде мұражайы бар. Бюст орнатылды. Рақмет!», – деді Қайрат Нұрқаділов.

Қоғам белсендісі Рысбек Сәрсенбай Orda.kz тілшісіне берген сұхбатында бастапқыда бюст емес, толыққанды ескерткіш орнату жоспарланғанын айтты. Сонымен қатар, ол саясаткердің өліміне қатысты жағдайды қайта қарауға шақырды.

«Ескерткіш болуы керек еді, бірақ ақырында бюст ашып жатыр. Бұл шешім түсініксіз. Сонымен қатар, Заманбек Нұрқаділовтің өліміне қатысты «суицид жасады» деген нұсқаны өшіріп, кім өлтіргенін анықтау қажет»,  деді Алтынбек Сәрсенбайдың ағасы әрі белсенді Рысбек Сәрсенбай. 

Бюсттің ашылуымен қатар, жергілікті өнер мектебіне ресми түрде Заманбек Нұрқаділовтің есімі берілді. Мектеп оқушылары музыкалық және би нөмірлерімен концерт ұйымдастырды.

Салтанатты рәсімнен кейін қатысушыларға Заманбек Нұрқаділовтің өмірі мен қызметі туралы «Не только о себе» атты кітаптың 300 данасы таратылды.

Салтанатты рәсім 25 қарашада өтуі тиіс еді, алайда Нұрқаділовтің бірінші жары Нұрбикенің қайтыс болуына байланысты кейінге шегерілді.

Саясаткердің қызы Құралай Нұрқаділова бюсттің жасалу жұмыстары ұзақ әрі мұқият жүргізілгенін айтты. Оның сөзінше, Кегендегі мектеп музейіне саясаткердің жеке марапаттары тапсырылған.

«Осылайша, уақыт өте келе әкемнің есімінің ақталу процесі жалғасып жатыр. Біздің сөзімізді естіп, диалог құрып жатқандары қуантады. Осы күнге ұзақ дайындалдық», – деді ол бюсттің ашылуына аз ғана уақыт қалғанда.

Заманбек Нұрқаділов – әйгілі саяси қайраткер, оның өмірі мен жұмбақ өлімі әлі күнге дейін қызу талқыланып келеді. Биыл наурыз айында Алматыда оның тұрған үйінің қасбетіне ескерткіш тақта орнатылды. Бюсттің орнатылатыны 2024 жылдың қаңтарында жарияланған еді.