Заңгер: Отбасындағы зорлық-зомбылыққа қарсы заң сөзсіз қажет

Қазақстанда жыл басынан бері «Отбасы мен тұрмыстағы зорлық-зомбылыққа қарсы іс-қимыл туралы» заң жобасы қызу талқыланып жатыр. Әлі заң ретінде бекітілмеген бұл жоба туралы қоғам пікірі әртүрлі. Қоғамда «Мұндай заң өте қажет» деп естептейтіндер де, «Жоқ, бұл заң қазақтың салт-дәстүріне қайшы» дейтіндер де бар.

«Отбасы мен тұрмыстағы зорлық-зомбылыққа қарсы заң керек пе?», «Ол расымен де салт-дәстүрге қайшы ма?» деген сұрақтарға заңгер Абзал Құспан жауап берді.

«Бұл заң бізге сөзсіз қажет. Бала тәрбиесінде, бала құқығын қорғауда қазақ баласының құқығы, қара нәсілді, ақ нәсілді баланың құқығынан ерекшеленбейді. Бұл заңды БАӘ, Сингапур сияқты мұсылман елдері де қолдаған. Заң жобасында қазақы салт-дәстүрге келмейтін баптар болған, бірақ оның біраз тұсы бірінші оқылымнан кейін-ақ алынып тасталған. Десе де заң жобасында әлі де өзгертулер енгізуді немесе тіптен алып тастауды қажет ететін баптар бар. Әлі қабылданбаған бұл заңдағы ондай баптарды талқылауға қоғамдағы кез келген адам белсене араласқаны жөн», - дейді Абзал Құспан.

Бұл заң жобасы парламент қабырғасында 2020 жылдың сәуір айынан бері қаралып жатыр. Осы уақытқа дейін жұмыс тобының 23 отырысы болған. Сарапшылар мен жоба авторларының айтуынша, наразылықтың көбі жобаның шикілігінен және дұрыс түсіндірілмегенінен болған. Оның үстіне, көпшілік сынап жүрген баптардың біразы құжаттан алынып тасталған. Дегенмен сарапшылар заң жобасы бұл күйінде қабылдана қоюы екіталай деп болжайды.