Қызылордалық хирургтер 4 жасар қыздың асқазанынан бір келіден астам шаш алды

4 ақпанда Қызылорда облыстық көпсалалы балалар ауруханасының хирургтары асқазан трихобезоары диагнозымен қызға ота жасады.

Олар 4 жасар бүлдіршіннің асқазанынан салмағы бір келі, 34 сантиметр болатын шаш шығарды.

Облыстық көпсалалы балалар ауруханасының жедел хирургия бөлімінің меңгерушісі Әлімжан Төлегеновтің айтуынша, бала оларға тәбетінің төмендеуі, ішінің ауыруы, құсу шағымдарымен түскен.

«Тексеру және диагностика кезінде ісік тәрізді түзіліс анықталды. Түскен науқастың жағдайы орташа ауыр деп бағаланды. Асқазанның алып трихобезоары табылды. Операцияны шұғыл жасау туралы шешім қабылданды» деді Әлімжан Төлегенов.

Операцияны хирург Әлімжан Төлегенов, анестезиолог Көркем Баекей, ассистент Самат Шуақбаев, ота жасаушы Ақмарал Бекташова жасады. Ота асқынусыз сәтті өтті.

«Бұл мұндай бірінші операция емес, екі жыл бұрын біз осындай операция жасадық» деп қосты дәрігер.

Хирург түсіндіргендей, трихобезоар - бұл тығыз біріктірілген шаштардан тұратын асқазандағы бөгде дене. Көбінесе бұл психологиялық бұзылуларға байланысты болады, балалар шашты, жүнді шайнап, жұтады. Осының бәрі жылдар бойы жиналып, тамақты қабылдап, қорыта алмайтындай асқазанды толады. Яғни, тәбеті болмай, құсады.

«Біздің болжамымыз бойынша, бала бір жасынан бастап шашын жей бастаған. Операциядан кейін қыздың жағдайы қанағаттанарлық. Ол ауруханада тағы кемінде 10 күн болады»  деді Төлегенов.