Қызылордада жалған үкім шығарған судья мен оның хатшысы сотталды

Қызылорда облысы Шиелі аудандық сотының бұрынғы судьясы мен оның хатшысы сотталды. Олар жалған үкім шығарды деген күдікке ілінді.

Астана телеарнасының хабарлауынша, судья Гүлнұр Құрманбайдың азаматтық істер бойынша шығарған үкімдері қайта тексерілу үшін сыбайлас жемқорлыққа қарсы іс-қимыл агенттігіне жіберілген. 

Бірақ қазіргі уақытта бала күтімімен үйде отырған екі әйел бұл істердің бәрінен хабарсыз болғандарын алға тартты.

Сот олардың кінәсін мойыныдамағанына қарамастан, үкім шығарды.

«Сотталушы Құрманбай Гүлнұр Құрманбайқызы ҚР Қылмыстық кодексінің 369-бабы, 418-бабы бойынша кінәлі деп танылды. Сотталушы Қыдырәлиева Еңлік Қалдыбекқызы ҚР Қылмыстық кодексінің 28-бабы, 369-бабы, 418-бабы бойынша сотталды» деді Қызылорда қаласы №2 сотының судьясы Жұлдыз Жакеева. 

Құрманбай  қылмыстық-атқару жүйесінің орташа қауіпсіз мекемесінде 2 жыл 6 айға бас бостандығынан айрылды. Оның хатшысы Қыдыралиева қылмыстық-атқару жүйесінің қауіпсіздігі барынша төмен мекемесінде 2 жылға сотталды. Судья хатшысының кішкентей сәбиі болғандықтан, оның жазасы кейінге қалдырылды.

Ал судьяның 2 жастағы ұлы, туыстары қараудан бас тартқан жағдайда,  қорғаншылық үйіне беріледі.

Үкім заңды күшіне енген жоқ.

«Тергеу әрекеттері заң жүзінде жүргізілмеген. Менің құқықтарымды бұза отырып жүргізілген. Сонда судьяның мәртебесі қайда? Бұл жағдай түрткі болғаны Шиелі сотының төрағасы  Күздібаев Мараттың жасалған кемшіліктер бойынша болған жағдайда ащы шындықты айтқаны үшін  маған жасаған әрекеті осы. Осыған алып келіп отыр ғой» дейді сотталушы Гүлнұр Құрманбай.