Қызылордада сарбаздың өліміне қатысы бар делінген күдікті ұсталды

5 қаңтардағы шеру кезінде 5547 әскери бөлімінің сарбазы Мадияр Қайсаров әріптестерін итеріп жіберіп, өзі көліктің астына түскен. Алған жарақаттарынан ол оқиға орнында көз жұмды.

Қызылорда облысы ІІД баспасөз қызметінің хабарлауынша, аталған факті бойынша ҚР Қылмыстық кодексінің 99-бабы 2-бөлігінің 15-тармағы «Адам өліміне әкеп соқтыру» бойынша сотқа дейінгі тергеу амалдары басталды.

– Арнайы іс-шаралардың нәтижесінде полицейлер сарбазды өлтірді деген күдікпен 31 жастағы Қызылорда қаласының тұрғынын ұстады және уақытша ұстау изоляторына қамады, - деп хабарлады полицейлер.

Тергеу жалғасуда. Тергеу құпиясына байланысты басқа мәліметтер жария етілмейді.