Қызылордада полицей жаяу жүргіншіні қағып, оқиға орнынан қашып кеткен

7 наурыз кешкі сағат 19:06 шамасында Жаңақорған елді мекенінде жол апаты орын алған.

Облыстық жол полициясы басқармасы баспасөз қызметінің хабарлауынша, жаяу жүргіншіні қағып өлтірген белгісіз жүргізуші оқиға орнынан қашып кеткен.

Оқиғаға орай қылмыстық кодекстің екі бабы бойынша тергеу амалдары басталды.

Жедел-іздестіру іс-шаралары нәтижесінде тәртіп сақшылары күдіктіні ұстады. Олар оның полиция қызметкері екенін анықтады.

«Ол уақытша ұстау изоляторына қамалды, тергеу амалдары жалғасуда» делінген хабарламада.

Полицейдің жұмыстан кеткен, кетпегені нақтыланып жатыр. Аудандық ішкі істер бөлімінің басшылығына да қызметтік тексеру жүргізілді. Тәртіптік кеңестің шешімімен бірқатар басшылар тәртіптік жауапкершілікке тартылды.