Қызылордада мал белгісіз індеттен арам өліп жатыр

Қызылорда облысы Талдыарал ауылында жаппай мал қырылып жатыр. Тұрғындар дабыл қағуда.

Астана телеарнасының хабарлауынша, төрт түліктің арам өлуіне жергілікті ветеринардың жауапсыздығы себеп болған. Ол малға екпені кеш салып, артынша ауырған малға еш көмек көрсетпеген. Енді жұртшылық қолда бар малынан айрылып қаламыз ба деп үрейленіп отыр.

«Хабарласамыз, келмейді. Ауырған кезде зорға шақыртып алдық. Сол кезде вакцина салып кетті. Салғаннан 3 күннен кейін малдар қырылып қалды. Мал шаруашылығы ғой, сатсаң, ақша болады» дейді Қызылорда облысының тұрғыны Жұмабек Аймағамбетов.

Алайда мамандар малға екпе уақтылы салынғанын алға тартты. Ал шаруалардың қолында арам қатып жатқан мал тіркеуге алынбаған екені анықталды. Дерек қорда жоқ малға екпе салынбаса керек.

Олар тұрғындарға малдарын тіркеп, уақтылы екпе салып, бақылауға алынуға кеңес берді. Бірақ малдың неден ауырып жатқаны әлі де белгісіз, болжам бойынша ауру жұқпалы емес.

«Оған біз вакцина жоспарлай алмаймыз. Біз дерекқор базасында қанша бас бар соған вакцина жоспарлаймыз жылдың басында. Сондай жағдайлар бар. Көбісі өз малдарын дерекқорға өтініш беріп енгізуі тиіс. Бірдейлендіру жұмыстары ол мемлекеттік қызмет көрсетуге жатады. Сол себепті тұрғындардың өзі өтініштерін беруге тиіс» дейді Қызылорда қалалық ветеринарлық станcа директоры Нұрлан Төлегенов.