Қызылордада биылғы 400 түлектің дипломы жұмысқа тұруға жарамсыз

Ақмешіт институты лицензиясынан айрылды, бірақ түлектердің дипломына сәйкестендіру коды жазылмаған.

Қызылордада Ақмешіт гуманитарлық-техникалық институтын бітіріп,  диплом алған 399 студент құжаты еш жерге жарамсыз.

Информбюро ақпараттық бағдарламасының хабарлауынша, олардың дипломы не әрі қарай оқуға, не жұмысқа тұруға жарамай қалған.

Оған себеп ретінде оқу орны оқытушыларының білім сапасының төмендігі мен техникалық базасының талапқа сай болмауы деп таныған БҒМ.

Алайда институт ректоры Ерлан Шынбергенов сотта оқу орнының талаптарға сай келетіні дәлелденіп, лицензия қайтарылғанын айтты. Ал дипломдарының жарамсыз болып қалуы сәйкестендіру коды жазылмағандықтан екен.

— Барлық жасалып отырған іс-әрекеттер, білім алушылардың да дипломының жарамдылығы сотпен дәлелденіп тұр. Енді Білім және ғылым министрлігі жеке сәйкестендіру кодын беріп, дипломдарды сәйкестендіруі тиіс. Сот шешімі шығып тұр. Енді біз комитеттің жауабын күтіп отырмыз, – деді Ерлан Шынбергенов.

Ал Білім және ғылым министрлігінің өкілі бұл ақпаратты жоққа шығарып, лицензия мәселесі әлі де сотта қаралып жатқанын жеткізді.

— Егер дипломдар жарамды болғанын қаласа, студенттер басқа жоғары оқу орнына барып, оқуын жалғастырса болады. Сол оқу орнын бітіргеннен соң ғана, жарамды диплом ала алады, – деп түсіндірді БҒМ сапаны қамтамасыз ету комитетінің төрайымы Гүлзат Көбенова.

Қазір Ақмешіт гуманитарлық-техникалық институтының институтында 600-ден аса студент білім алып жатыр. Лицензия мәселесі шешілмесе, оларды да осы мәселе күтіп тұрғаны анық.