Қызылорда-Жезқазған автомобиль жолына жөндеу жұмыстары жүргізіледі

Қызылорда мен Жезқазған арасындағы ескі тас жолдың жөнделіп, заманауи стандарттарға сай болуы соңғы жылдары қоғам тарапынан жиі айтылуда.

Қызылорда облысы әкімдігі жыл басында бірнеше мәрте үкіметтік деңгейде осы мәселені көтерген. Қос өңірдің халқы үшін аса маңызды Қызылорда-Жезқазған тас жолын жөндеу жұмыстары биыл қолға алынады.

— Күні кеше Қазақстан Үкіметі тарапынан «Қазавтожол» ұлттық компаниясы Еуропа қайта құру және даму банкімен құны 240 миллион доллар тұратын Жезқазған-Қызылорда автомобиль жолының жаңа жобасына қол қойды.Компания бұл қаржыны Қызылорда мен Жезқазған арасындағы ұзындығы 204 шақырымдық ескі жолды күрделі жөндеуге, сондай-ақ, Қызылордадағы ұзындығы 14,8 шақырымдық айналма жолдың құрылысына бөлмек. Жолды салу бағыты Қызылорда облысы жағынан басталады, - деді аймақ басшысы.

Аталған тас жол Қытайдың батысы мен Ресейдің Орал өңірін байланыстыратын Е123 стратегиялық бағыты бойынша жолаушылар мен жүк тасымалын жақсартады. Жоба аймақтардың байланысын жақсартуға, жол қозғалысы қауіпсіздігін арттыруға мүмкіндік береді.

Сондай-ақ еліміздің ұлттық автожол жүйесінде электромобильдерді қолдануды қамтамасыз ететін жол инфрақұрылымын құруға көмектеседі. Қазір Сыр елі автокөлік жолының жалпы ұзындығы – 3398 шақырым. Оның ішінде 1016 шақырымы республикалық, қалған бөлігі – облыстық және аудандық деңгейдегі жолдар.

 Биыл жол жөндеу мақсатында барлық қаржы көзінен 19 млрд теңгеден астам қаржы бөлінді. Нәтижесінде ұзындығы 488 шақырым автокөлік жолы, көшелер мен жолаушылар өткелі жөнделуде. Сонымен қатар 397 шақырым автомобиль жолдары, көпір өткелдері мен көшелер жөнделетiн болады.