Қызылорда облысында шетелдіктер жүк пойызына мініп, көңіл көтерді

Германия мен Нидерланды  азаматтары жүк пойызына мініп көрмек болған, деп хабарлайды Orda.kz Қызылорда облыстық көлік басқармасының баспасөз қызметіне сілтеме жасап.

Облыстың Шиелі стансасындағы желілік полиция бөліміне «Әскерилендірілген темір жол күзеті» ЖШС қызметкерлерінен жүк пойызы вагондарының бірінде бейтаныс адамдардың бар екендігі туралы хабарлама түсті.

«Тексеру барысында көлік полицейлері жүк пойызына  мініп, көңіл көтеруге бел буған 24 жастағы Голландия азаматы мен 25 жастағы Германия азаматын анықтады. Шетел азаматтарының маусым айының соңында елге туристік сапармен келгені анықталды»  деп мәлімдеді министрліктің баспасөз қызметі.

Құқық бұзушыларға қатысты ҚР ӘҚБтК-нің 560-бабының 1-бөлігі «Жүк пойыздарында заңсыз жүру» бойынша әкімшілік хаттама толтырылып, әрқайсысына 5 АЕК көлемінде айыппұл салынды.

Айта кетейік, 2022 жылдың басынан бері Қазақстанда 972 азамат жолаушылар пойыздарынан шығарылды. Олардың көпшілігіне қатысты алкогольдік ішімдіктерді ішкені үшін әкімшілік хаттамалар толтырылған.

Пойыздан түсірілген 972 азаматтың басым бөлігі – 826-сы – қоғамдық орындарға мас күйінде шыққаны үшін, тағы тоғызы – темекі өнімдерін тұтынуға тыйым салу талабын  бұзғаны үшін, 87-сі – ұсақ бұзақылық жасағаны үшін жазаланды.