Қызылорда облысында Конго-Қырым безгегінің 113 ошағы анықталды

Қызылорда облысының санитарлық дәрігерлері өңірде кенелердің белсенділігі артқанын айтып, дабыл қағуда.

Бұл туралы  Orda.kz «Хабар 24» сілтей отырып хабарлайды.

Конго-Қырым безгегінің табиғи ошағы 113 елді мекенде анықталып отыр. Жыл басынан бері кене шаққан 288 адам медициналық көмекке жүгінген. Бұл өткен жылғы кезеңмен салыстырғанда 10,5% көп.

Бүгінде облыс аймағында  қанды безгектің 11 дерегі тіркеліп отыр. Соңғысы Шиелі ауданында анықталған. Жалпы Қармақшы, Сырдария аудандары мен Қызылорда қаласында қауіпті жәндіктің белсенділігі байқалады. Санитарлық дәрігерлер тұрғындарға кенеден сақтану жолдарын түсіндіру шараларын бастап кетті.

– Аса қауіпті саналатын КҚГҚ емдеуге дәрі-дәрмек қоры жеткілікті. Иммуноплазмалар бар. Оны емдейтін персоналдың барлығы оқытылған. Сондықтан мал шаруашылығымен айналысатын адамдарда КҚГҚ клиникалық белгілері байқалғанда дер кезінде медициналық көмекке жүгінсе, бұл індеттен толық айығып шығуға болатынын еске саламыз, - дейді облыстық санитарлық-эпидемиологиялық бақылау департаментінің баспасөз хатшысы Айман Жанахаева.