Қызылорда маңына Ан-2 ұшағы құлады

Қызылорда маңында Ан-2 ұшағы апатқа ұшырады, деп хабарлайды  Orda.kz. ТЖМ-ге сілтеме жасап.

Қызылорда қалалық әкімшілігіне қарасты Қарауылтөбе ауылынан 12 шақырым жерге  ұшақ құлады. Оқиға бүгін, 4 шілдеде сағат 07.00 шамасында болған.

АН-2 ұшағы күріш алқаптарына  өңдеу жұмыстарын жүргізу барысында құлаған,  деп мәлімдеді  ТЖМ баспасөз қызметі.

Ведомствоның мәліметінше, ұшақ әуеге көтерілгеннен кейін бірнеше шақырымнан соң техникалық ақауларға байланысты мәжбүрлі түрде қонбақ болған кезде апатқа ұшыраған.

 —Техникалық ақауларға байланысты ұшудан бірнеше шақырым өткен соң, мәжбүрлі қону кезінде ұшақ тікелей алаңға құлады.  Ұшақ бортында 1954 пен 1967 жылы туған екі пилот болды. Олар дереу түрде ауруханаға жеткізілді. Алдын ала мәліметтерге сәйкес, олардың жағдайы қанағаттанарлық деп бағалануда, - деп мәлімдеді ТЖМ.

 Анықталғандай, АН-2 ұшағы «Илиса»  ЖШС-ға тиесілі екен.