Қызылорда: колониядағы жазасын өтеуші өз-өзіне қол жұмсады

Қызылорда облысындағы сотталушы өз-өзіне қол жұмсады. Қайғылы оқиға ағымдағы жылдың 2 желтоқсанында болған.

Ведомствоның әлеуметтік желідегі ресми сайтында хабарлағандай, оқиға орнына тергеу тобы, прокуратура өкілдері мен облыстық ҚАЖД басшылығы келген.

– Бейнебақылау камераларының материалдары зерттеліп, басқа сотталушылармен әңгіме жүргізілді. Алғашқы тексеру нәтижесінде оған қатысты заңсыз әрекеттер фактісі анықталған жоқ, - делінген хабарламада.

Сотталған азамат Қазақстан Республикасы Қылмыстық кодексінің 99-бабының 1, 24-бөлігі, 3-бөлігі («Адам өлтіру») бойынша жазасын өтеп жатқан.

– Айта кетейік, сотталушы мекеменің психологиялық қызметінде «өзіне-өзі қол жұмсауға бейім» деп тіркелген, «оған қоса, органикалық галлюциноз» диагнозы қойылған, - делінген хабарламада.

Қазіргі уақытта сотқа дейінгі тергеу жүріп жатыр, қызметтік тексеру тағайындалды.