Қызылорда әкімінің баспасөз хатшысы Бекееваның жағдайына қатысты пікір білдірді

Бірнеше жыл бойы Қызылорда қаласы әкімінің баспасөз хатшысы қызметін атқарған Балгүл Мамен өзіне қол салмақшы болған Шымкент ПД баспасөз хатшысы Мөлдір Бекееваның жағдайына қатысты пікір білдірді.

Оның айтуынша, ол қудалауға ұшырап, мемлекеттік қызметтегі әріптестерінің құйтырқы әрекеттерінен зардап шеккен.

«Кейде шыдамның да шегі болады. Мөлдір жұмыс істеп жүрген ортасына сай одан сайын қасқыр болуы керек еді. Дей тұрғанмен қыз бала ғой, тым нәзік. Нәзік бола тұра ондай ортада жұмыс істеудің өзі батылдық. Қоғаммен байланыс орнатып, жанталасып жүрген қызды ең болмаса әріптестері жығылғанға жұдырық етіп үсті-үстіне таламау керек еді… Әттең барлық жерде бар екен...» деп жазды ол өзінің парақшасында.

Сондай-ақ, Балгүл Мамен мұндай жағдайда құзырлы органдар тексерісті дұрыс жүргізбейді деп, оларды сынға алды.

«Бірін бірі аңду, сату, моральдық тұрғыдан қыспаққа алу, қызғаныш, көре алмаушылық, әңгіме-сөз, өсек, бітпейтін интрига өте көп. Айналдырған 3-4 адамның құйтырғы әрекеті жан-жағымнан шыр айналдырса да да ата-анам, бауырларым мен әріптестерім, достарымның қолдауының арқасында ситуациядан аман-есен шығып, мықты болдым.  Барлық жерде мемлекеттік қызмет істер агенттігі, еңбек инспекциясы, т.б. бар, бірақ осындайда жұмыс деңгейі қаншалықты екені көрініп қалады… Міндетті түрде бір жағдай орын алғанда, иа болмаса ушыққанда тексеріс жүргізбей, профилактика жасап тұрғандары жөн еді» дейді бұрынғы Қызылорда әкімінің баспасөз хатшысы.

Айта кетсек, Балгүл Мамен Қызылорда қаласының әкімі Нұрлыбек Нәлібаев болған кезде баспасөз хатшысы қызметін бірнеше жыл атқарған. Басшылыққа Ғанибек Қазантаев келген кезде жұмыстан кеткен.