Қызметкерлерін ұрған желілік полиция бастығы қызметінен босатылды

Қызметкерлеріне қол көтерген сәті бейнебақылауға түсіп қалған Нұр-Сұлтан қалалық әуежайының желілік полиция бөлімінің басшысы Мақсат Әбікен қызметінен босатылды.

Бұл туралы Orda.kz хабарлайды.

Тексеріс жүргізген полиция департаменті полиция бастығы мен кадр саясаты жөніндегі орынбасарын қызметінен босатты. Тәртіптік сипаттағы шаралар көліктегі ПД басшылық буынының қызметкерлеріне қатысты да қабылданатыны айтылды.

«Көліктегі полиция департаментінің басшылығы бұл жағдай өрескел заң бұзушылық деп санайды және қызметтік-әскери тәртіпті бұзатын басшылар мен қызметкерлерден өз қатарларын тазартудың қағидатты ұстанымын ұстанады» делінген көліктегі ПД хабарламасында.

Бұған дейін Instagram-да Нұр-Сұлтан әуежайы желілік полиция бөлімінің бастығы Мақсат Әбікен (қызыл жемпірдегі ер адам) қызметкерлерді ұрып-соғатын видеосы желіде жарияланған болатын. Белгісіз дереккөздің хабарлауынша, елордалық әуежайдың ЖРБ бастығы қызметкерлерді қорқытып, үнемі қорлап келген және жұмыстан шығарамын деп бопсалаған.