Қызметінен босатылған Алексей Цой үндеу жасады

Бұрынғы Денсаулық сақтау министрі Алексей Цой Қазақстан халқына үндеу жасады.

– Құрметті жерлестер, әріптестер, денсаулық сақтау қызметкерлері, сіздерді басты мерекеміз – Қазақстан Республикасы Тәуелсіздігінің 30 жылдығымен құттықтауға рұқсат етіңіздер, - деді Цой.

Ол өзіне мемлекет басшысының COVID-19-ға қатысты жағдайды тұрақтандыру, денсаулық сақтау жүйесінің әлеуетін арттыруды тапсырғанын еске салды.

– Өтіп бара жатқан жылдың ауыр жағдайлары, әлемде өршіп тұрған COVID-19 пандемиясы біздің денсаулық сақтау саласы үшін үлкен сынаққа айналды, сіздердің әрқайсыңыздан кәсіби және адами ресурстарды үлкен жұмылдыруды, мейірімділікті, төзімділік пен азаматтық адалдықты талап етті. Ең алдымен, әріптестеріме науқастардың игілігі үшін күнделікті еңбектері, таңдаған мамандығына берілгендіктері және қазақстандықтардың өмірін сақтап қалғандары үшін шын жүректен алғыс айтқым келеді.

Экс-министр «Дені сау ұлт» ұлттық жобасы мақұлданғанын, ДДСҰ, ЮНИСЕФ және БҰҰ-ның басқа да агенттіктерімен өнімді серіктестік орнатылғанын, денсаулық сақтау саласын цифрландыру жобалары қолға алынғанын айтты.

– Бұл әріптестермен бірлесе отырып, жақсы нәтижелерге қол жеткізген бірнеше сала ғана. Ел басшылығына, Президент Әкімшілігіне, премьер-министрге, үкіметтегі әріптестерге, Денсаулық сақтау министрлігіне, барлық жергілікті атқарушы органдарға, азаматтық секторға, бұқаралық ақпарат құралдарына, волонтерлерге, үкіметтік емес ұйымдарға және құрметті медицина қызметкерлеріне сенімдері үшін алғыс айтамын. Барлығына жақсылық, зор денсаулық және позитивті көңіл-күй тілеймін, - деп түйіндеді экс-министр.