Қытайлық компанияның жұмысшылары наразылық білдірді

«Меркі-Шу-Бурылбайтал» тас жолының құрылысы бойынша қытайлық «Синь Синь» компаниясының көлік жүргізушілері жалақы көтеру мен еңбек қауіпсіздігін сақтау бойынша президентке талап қойған болатын.

Талапты тыңдауға Жамбыл облысы әкімінің орынбасары Нұржан Календеров, «Қазавтожол» АҚ Жамбыл облысы бойынша филиалының директоры Айжан Туғанова келіп, талаптың орындалуына 3 күн уақыт берген.

Үш күн өткеннен кейін Меркі ауданына жергілікті билік өкілдері, қытайлық «Синь Синь» компаниясы өкілдері бастамашыл топпен кездесті. Кездесу барысында жалақының 10-15% көтерілетіндігі айтылды. Жаңа униформаны дүйсенбіден бастап таратып, келіскендер 19 сәуірден бастап жұмысқа шықсын деген талап қойылды.

Жұмыс берушінің талабын естіген жұмысшылар келіспейтіндіктерін айтып, наразылық білдірді. 60 мың теңге жалақы 66 мың теңгеге көтеріледі. Жұмысшылардың айтуынша, қазіргі уақытта инфляция күннен күнге өршіп барады. Олар мардымсыз айлықпен келіспейді.

Жұмыс берушінің талабын тыңдап болған жұмысшылар нақты жұмыс беруші категорияға қарамай, барлық жұмысшыларға жалақыны 80% көтеруді талап етті.

Айта кетейік, қазіргі таңда жұмысшылардың арызы негізінде еңбек қатынастары бойынша облыс әкімдігі мен еңбек инспекциясы тексеріс жүргізіп жатыр. Қытайлық «Синь Синь»компаниясы бұл жағдайға қатысты пікір білдіруді кейінге қалдырды.

Исламбек Дастан, Жамбыл облысы.