Қытай консулдығы алдындағы наразылыққа 100 күн

18 мамырда Алматыдағы Қытай консулдығы алдында өтіп жатқан наразылық науқанына 100 күн толды. Адамдар Қытайда қалып қойған туыстарын қайтаруды талап етіп отыр.

Бұл туралы Orda.kz Азаттыққа сілтеме жасап хабарлады.

Бүгін акцияға 10-нан астам адам жиналды. Наразылық білдірушілер:

• Шыңжаңдағы «саяси қайта тәрбиелеу лагеріне» қамалғандарына;
• «Негізсіз айыптармен» ұзақ уақыт сотталғандығына;
• Қытай билігінің олардың құжаттарын тартып алғанына;
• Жақындарының шекарадан өте алмай жатқандықтарына шағым түсірді.

Полиция әдеттегідей наразыларды консулдыққа өткізбеді.

Осы жолы науқанға тіркелмеген Қазақстанның демократиялық партиясының мүшесі Абзал Достияров бастаған бірді-екілі адам қолдап келді.

Консулдық наразылық туралы біле ме, жоқ па белгісіз. Себебі күзетшілер бұл сауалға жауап бермеді.

Жергілікті әкімдік өкілі наразыларға акцияның «заңсыз» екенін ескертті. Алайда, ол адамдарды тоқтатпады, олар талаптары орындалмайынша кетуден бас тартты.

Айта кетсек, өткен аптада наразылыққа шыққан 8 адам әкімшілік жауапқа тартылды.