Қытай геноцид жасауын доғармады

БҰҰ-ның геноцидті ескерту және жазалау туралы конвенция шарттарын бұзған Қытай үкіметі ұйғырларға геноцидтік саясат жүргізуін доғармай отыр, деп хабарлайды ORDA. Азаттық Рухына сілтеме жасап.

Стратегия және саясат жөніндегі Newlines институты Пекиннің мұсылман топтардың әрекетіне тәуелсіз сараптама жасап, бұл саясат геноцидке қарсы конвенцияның әрбір бабына қайшы деген қорытынды жасайды.

Бұған дейін де Қытай Шыңжаңның батысында 1 млн-нан астам ұйғыр мен өзге де түркі тілді этникалық топтарды концентрациялық лагерлерге қамағаны үшін айыпталып, сыналған. Пекин қамау орталықтарын экстремизм және терроризмге қарсы шара және кәсіпке баулитын орталық деп атаған.

Қаңтар айында Дональд Трамп әкімшілігі Қытай Шыңжаңда адамзатқа қарсы геноцид және қылмыс жасап жатыр деп мәлімдеген. Джо Байденнің жаңа әкімшілігі де бұл жөнінде өзінің пікір-көзқарасын өзгертетіндей ешқандай негіз таппады деп мәлімдеді.

«Ұлттық, этникалық, нәсілдік немесе діни топтарды тұтас немесе олардың бір бөлігін құртуды көздейтін» әрекет деп сипаттаған геноцидке қарсы конвенцияға Қытай да қол қойған. Жоғарыда айтылған зерттеуге сәйкес, геноцид ұғымына сонымен бірге түп-тамырымен жою, жаппай лагерлерге қамау, тууды шектеу және оның алдын алу кіреді.