Қытай Бейжің Олимпиадасындағы алғашқы алтынды жанжалмен алды

Бейжің Олимпиадасында шорт-тректен Қытай ұлттық құрамасы аралас эстафетада алтын жеңіп алды, деп хабарлайды Sport-Express.

Екінші орынды Италия құрамасы иеленді. Үздік үштікті Венгрия түйіндеді.

Айта кетейік, жартылай финалда жанжалды эпизод орын алған болатын. Қытайлық спортшылар үшінші орынға ие болғандықтан  финалға жолдама алмауы керек еді.

Алайда, жарыстан кейін төрешілер эстафеталық таяқшаны беру ережесін бұзғаны үшін бірден екі команданы – бірінші мәреге жеткен АҚШ құрамасы мен төртінші орын алған Ресей құрамасын жарыстан шеттеткен.

Дегенмен, Қытай құрамасының да эстафетаны тасымалдауға қатысты қателіктері  болғанын ескерген жөн.

Нәтижесінде төрешілер шешімімен финалда АҚШ-тың орнын Қытай құрамасы иеленді.

Ойындарды қабылдаушы елдің командасы үшін бұл Бейжің Олимпиадасындағы алғашқы алтын медаль.