Қытай Қазақстанға көмек көрсетуге дайын

Қытай Қазақстанның тілегіне сай және өз мүмкіндіктері шегінде көрші елге көмек көрсетуге дайын, деп хабарлады РИА Новостиге ҚХР СІМ баспасөз қызметі.

Бұған дейін Қытай төрағасы Си Цзиньпин Қазақстан президенті Қасым-Жомарт Тоқаевқа жолдауында Бейжің Қазақстанның тұрақтылығына нұқсан келтіретін және ел қауіпсіздігіне қатер төндіретін кез келген күштерге табанды түрде қарсы тұратынын айтқан. Си Цзиньпин екі ел арасындағы достыққа нұқсан келтіретін және ынтымақтастығына кедергі келтіретін кез келген әрекетке қарсылық білдірді. Сондай-ақ Қазақстанға қажетті қолдау мен қиындықтарды жеңуге көмектесу үшін қолдан келгеннің бәрін жасауға дайын екенін мәлімдеді.

«Қытай мен Қазақстан - тату көршілер және тұрақты стратегиялық серіктестер. Қытай Қазақстанмен тығыз қарым-қатынасты сақтап келеді және Қазақстан тарапының тілектеріне сәйкес және өз мүмкіндіктеріне сәйкес көмек көрсетеді» деді министрлік.

Сыртқы істер министрлігі Қытайдың тыныштықты қалпына келтіруге, экономикалық дамуға және Қазақстан халқының өмірін жақсартуға көмектесетін шараларға сындарлы көзқарасты ұстанатынын мәлімдеді.

Сонымен бірге ҚХР Сыртқы істер министрлігі Қытай Қазақстанға қандай көмек көрсетуге дайын және қажет болған жағдайда ол жерге өзінің бітімгершілік күштерін жіберуге дайын ба деген сауалға тікелей жауап бермеді.