Қытай АҚШ-тың 28 азаматына санкция жариялады

Қытай елдің ішкі істеріне араласуына байланысты АҚШ-тың 28 азаматына қарсы санкциялар енгізді. Бұл туралы ҚХР Сыртқы істер министрлігі хабарлады.

«Соңғы бірнеше жылда АҚШ-тағы кейбір саясаткерлер қытайларға қарсы саяси мүдделерінен, Қытайға деген жеккөрушіліктен қытай және американ халықтарының мүдделерін елемеді. Қытайдың ішкі істеріне елеулі түрде араласып, Қытай мүдделеріне нұқсан келтірді. Бірқатар ессіз әрекеттерді жоспарлап, алға тартты. Бұл Қытай халқын ренжітіп, Қытай мен АҚШ қарым-қатынасына үлкен нұқсан келтірді», - делінген Қытай СІМ хабарламасында.

Ел үкіметі өзінің ұлттық егемендігін, қауіпсіздігі мен даму мүдделерін қорғауға бел буғаны атап өтілді.

28 адамға, оның ішінде бұрынғы мемлекеттік хатшы Майкл Помпеоға, Ұлттық сауда кеңесінің басшысы Питер Наварроға, президенттің ұлттық қауіпсіздік жөніндегі көмекшісі Роберт О'Брайенге және басқаларға қарсы санкциялар салынды.

Санкциялар тізіміндегі адамдарға және олардың отбасыларына Қытайға, Гонконгқа және Макаоға кіруге, сонымен қатар Қытайда бизнес жүргізуге тыйым салынды.

Майк Помпео АҚШ-тың Мемлекеттік хатшысы болған соңғы күнінің қарсаңында Қытай Шыңжаңдағы ұйғыр мұсылмандарына қарсы репрессия кезінде «геноцид пен адамзатқа қарсы қылмыстар» жасады деп мәлімдеді.