Ыстамбұлда түркі елдерінің медиа ынтымақтастығы талқыланады

Түркі мемлекеттері ұйымына мүше елдер ақпарат және БАҚ министрлерінің 14 мамырдағы төртінші отырысында медиа саласындағы ынтымақтастықты талқылайды.

Анадолу агенттігінің хабарлауынша, құрылтай деп аталатын жиынға Түркия, Әзірбайжан, Қазақстан, Қырғызстан, Өзбекстанның министрлері мен жоғары лауазымды тұлғалары, сондай-ақ бақылаушы елдер - Венгрия мен Түркіменстанның өкілдері қатысады.

Күн тәртібінде БАҚ және коммуникациялар саласындағы бірлескен зерттеулер мен жобалар, сонымен қатар  БАҚ саласындағы ынтымақтастықты дамытуға қатысты мәселелер бар.

Кездесуге ҚР Ақпарат және әлеуметтік даму министрі Асқар Умаров, Венгрия Сыртқы істер және сауда министрлігінің Қауіпсіздік саясаты жөніндегі мемлекеттік хатшысы Петер Штарай, Өзбекстан Президенті Әкімшілігі Асаджон Ходжаев, Қырғызстан Мәдениет, ақпарат, спорт және жастар саясаты министрлігі жанындағы Ақпарат және бұқаралық коммуникациялар департаментінің директоры Салқын Сарноғоева, Түркіменстанның Анкарадағы Елшісі Ишанқұл Аманлы  және Ақпарат және бұқаралық коммуникациялар агенттіктерінің басшылары   қатысады деп жоспарлануда.

Іс-шараға ресми делегациялардан бөлек, түркі әлемінің БАҚ және коммуникация мекемелерінің басшылары, сарапшылар, өнер қайраткерлері, ғалымдар мен коммуникация факультеттерінің студенттері қатысады.