Үш жарым жылға сотталған Сәтбаевтың бұрынғы әкімінің үкімі өзгеріссіз қалды

Шапағат Әубәкір 10 миллион теңге көлемінде пара алғаны үшін сотталды.

Сәтбаевтың экс-әкімі үкімге шағымданбақ болғанымен, сот өтінішті қанағаттандырмады.

«Облыстық соттың апелляциялық сот алқасының ұйғарымымен бұл үкім өзгеріссіз қалдырылды, сотталған Әубәкірдің, оның қорғаушысының апелляциялық шағымы және прокурордың апелляциялық шағымы қанағаттандырылмады» делінген хабарламада.

Еске сала кетейік, сот биылғы жылдың ақпан айында жол жөндеумен айналысқан жергілікті кәсіпкердің Сәтбаев қаласының әкімі қызметін атқарған Шапағат Әубәкірге пара бергенін анықтаған болатын. 10 миллион теңгеге экс-әкім кәсіпкерге мемлекеттік сатып алу келісімшартының сомасын ұлғайтуға және оны ұзартуға көмектесуге уәде берген.