«Үш дүркін әлем чемпионы боламын»: Назым Қызайбай елге оралды

Олимпиаданың қола жүлдегері Назым Қызайбай Алматыға оралды. Жұртшылық 12 тамыз күні түнде спортшыны туған қаласының әуежайында қарсы алды. 

Бұл туралы Қазақстан бокс федерациясы хабарлады.

«Халық осылай күтіп алған соң, жеңіске жеткенімді енді сезініп жатырмын. Барлық жанкүйерлерге мың алғыс! Халықтың қолдауын сезіндім. Елімнің, ата-анамның, бауырларымның, әкем жағынан, ауылымнан, Райымбек ауданынан да үлкен қолдау болды, тек Қазақстанның әр түкпірінен ғана емес, Италиядан да, бауырларымның тақым қысып отырғанын сезіндім. Өздеріңіз білетіндей, бізде бокстан үш дүркін әлем чемпионы жоқ. Тарих жаңартып, сол мақсатқа жетемін деп ойлаймын. Бокс өзіме ұнады, сол үшін спортқа келдім. Ауылда бапкерімнің арқасында жетістіктерге де жеттік. Жеңістің артында қаншама еңбек, қаншама адам бар...», — деді Назым Қызайбай.

Еске сала кетсек, Orda.kz 7 тамызда бокстан екі дүркін әлем чемпионы Олимпиада-2024 жартылай финалында жеңіліс тауып, 50 келіге дейінгі салмақ дәрежесінде қола жүлдеге ие болғаны жайлы жазды. Финалға шығу үшін Кызайбай 2022 жылғы әлем және Азия ойындарының чемпионы, қытайлық Ю Вумен кездесті. 

Сондай-ақ, Назым Қызайбайды марапаттау рәсіміне Геннадий Головкин қатысқан болатын.