Үржар ауданындағы бензин тапшылығы немен байланысты?

Үржар ауданында АИ-92 және АИ-95 маркалы бензин көлемінің төмендеуі Мақаншы ауданындағы Алакөл жағасында туристік маусымда келіп-кетуші көліктің  көбеюі мен жанармай құю станциясында АИ-92  бензинінің тапшылығына байланысты.

Бұл туралы Абай облысының баспасөз қызметі хабарлады.

Бүгінгі таңда Үржар ауданында тоғыз жанармай құю бекеті бар. Оның төртеуі Үржар ауылында, үшеуі Ақжар ауылында, екеуі Таскескен ауылында. Оның біреуі уақытша жұмыс істемейді. Жанармай құю бекеттері ішінде тек бір  ғана бекет халыққа газбен қызмет көрсетеді.

Қазіргі таңда облыстағы жанар-жағармай қоры: АИ-92 – 24,1 тонна, АИ-95 – 5,4 тонна, дизель отыны – 64,3 тонна.

Дегенмен туындаған қиындықтарға қарамастан ауданда отынның жеткілікті мөлшері бар, барынша мүмкін көлемде бөлінген. Қазіргі таңда ауданға 23,6 тонна бензин әкелініп, жанармай құю бекеттерінде құйылып жатыр. Баспасөз қызметі  қалған жанармай жақын арада жеткізілетінін айтты.