Қырғызстанның экс-президенті Асқар Ақаев Бішкекке өз еркімен келді

Іздеуде жүрген Қырғызстанның бұрынғы президенті Асқар Ақаев Бішкекке өз еркімен ұшып келді.

Бұл туралы Orda.kz хабарлайды.

Елдің бұрынғы премьер-министрі Феликс Куловтың айтуынша, Асқар Ақаев Бішкекке өз еркімен «Құмтөр» жобасы бойынша қылмыстық іс аясында айғақ беруге келген. Ол тергеушілермен бірге жұмыс істеуге дайын.

– Садыр Жапаров экс-президентке келуге мүмкіндік берді. Менің білуімше, Асқар Ақаевты ешкім мәжбүрлемеді, ал Бішкекке келгеннен кейін ол ұлттық қауіпсіздік мемлекеттік комитетіне барды, - деді ол.

Бұған дейін Қырғызстан Ұлттық қауіпсіздік мемлекеттік комитеті Асқар Ақаевтың ҰҚК ғимаратында екенін, ол жерде қылмыстық іс аясында қажетті тергеу әрекеттеріне қатысатынын хабарлаған.

– Ақаев жоғары лауазымды шенеуніктермен бірге 1992 жылы «Құмтөр» жобасы бойынша бас келісім жасасу кезінде және1994 жылы өзгертулер енгізу кезінде сыбайлас жемқорлық үшін жауапқа тартылды, - деп хабарлады ҰҚК.

Ақаевты республика аумағына әкелу арқылы қылмыстық жауапкершілікке тарту тұрғысынан тарихи әділеттілікті қалпына келтіруге бағытталған белсенді жұмыстар жүргізілгені атап өтілді.

Асқар Ақаев 1990 жылдан бастап Қырғыз КСР президенті, 2005 жылдың сәуіріне дейін Қырғызстан президенті болды.