Қырғызстанның бұрынғы вице-премьері ұсталды

«Құмтөр»  алтын кеніндегі жемқорлыққа қатысты қылмыстық іс бойынша Қырғызстанның бұрынғы бірінші вице-премьер Тайырбек Сарпашев қамауға алынды.

Бұл туралы Қырғызстанның ұлттық қауіпсіздік жөніндегі мемлекеттік комитеті хабарлады. Комитет баспасөз орталығының хабарлауынша, күдікті канадалық Centerra Gold Inc. компаниясы мен елдің жоғары лауазым иелерімен байланыс орнатып, канадалық компанияның мүддесі үшін қылмыстық әрекет жасаған.

Мемлекеттік комитеттің мәліметінше, қырғыз үкіметінде жауапты қызмет атқарған Тайырбек Сарпашев Centerra Gold Inc. компаниясының мүддесі үшін «Мұздықтар туралы»  заң жобасының қабылдануына кедергі жасаған.

Арнайы қызмет экс-шенеунікті  жемқорлық жасады деген күдікпен 17 маусымда ұстады. Бұған дейін де  «Құмтөр» ісі бойынша бірнеше бұрынғы шенеунік, қазіргі және бұрынғы депутаттар ұсталған.