Қырғызстанның бұрынғы президенті Жээнбеков жауапқа тартылады

Қырғызстанның бұрынғы президенті Сооронбай Жээнбеков бұрынғы вице-премьер Дуйшенбек Зилалиев ісі бойынша куә ретінде сотқа шақырылды. Бұл туралы Зилалиевтің адвокаты Талайгул Токтакунова айтты.

«Зилалиевті ұстаған кезде «Оптима Банк» жәшігінен миллион доллар тәркіленгені жөнінде видео желіде тараған. Қырғызстанның ұлттық қауіпсіздік жөніндегі мемлекеттік комитеті жүргізген тергеуде Зилалиев бұл ақша онікі емес екенін, Сооронбай Жээнбековтің сайлау кампаниясына қажет ақша екенін айтқан. Бірақ Жээнбеков ол кезде президент болғандықтан тергеуге шақырылмаған. Ал ұлттық қауіпсіздік жөніндегі мемлекеттік комитеті ақша Зилалиевке тиесілі деп істі сотқа берген. Қазір бұрынғы президенттің кез келген азамат сияқты құқықтары мен міндеттері бар» деді адвокат.

Жээнбеков 3 ақпан күні сотқа баруы тиіс. Токтакунованың айтуынша, ол 28 қаңтарда шақыртылған, бірақ Жапаровтың инаугурациясына байланысты  сотқа бара алмаған. Экс-президенттің өзі немесе адвокаттары оқиғаға түсініктеме бермеді.

Зилалиев 2018 жылы 9 желтоқсанда «заңсыз байыды» деген күдікпен ұсталған. Арнайы қызмет оның үйінен мен банк жәшігінен ақша тәркіленген видеоны таратып, жылжымайтын мүліктерінің суреттерін жариялаған. Ал Зилалиев бұған дейін өзіне тергеу огандары қысым жасап, бұрынғы президент Алмазбек Атамбаевқа қарсы куәлік беруге мәжбүрлегенін айтқан.

Бішкектің Первомай аудандық соты 2020 жылдың қазанында Зилалиевті 9 жылға бас бостандығынан айырды.  Қазір Бішкек соты оның апелляциялық шағымын қарап жатыр.