Қырғызстанда вакциналау науқаны басталды

Қырғызстанда коронавирустық инфекцияның жаңа түріне қарсы вакцинацияның бастапқы кезеңі басталды. Бірінші болып денсаулық сақтау және әлеуметтік даму министрі мен оның орынбасарлары егілді. Қытайдан алынған вакцинаның алғашқы партиясы халықтың белгілі бір топтарына ғана жетеді.

Ақпарат Азаттық Радиосында жарияланды, деп хабарлайды Orda.kz.

Ресми түрде вакцинация науқаны 29 наурызда Бішкекте басталды. Қырғызстанның астанасында бұған дейін отбасылық медицинаның төрт біріккен орталығы ашылды.

Вакцинаға қытайлық «sinopharm» препараты қолданылады. Естеріңізге сала кетейік, Қырғызстан бұл вакцинаның 150 мың дозасын алды, бұл 75 мың адамға жетеді.

29 наурызда өткен баспасөз мәслихатында Денсаулық сақтау және әлеуметтік даму министрі Алымқадыр Бейшеналиев қытайлық препараттан туындауы мүмкін асқынулар үшін жауапкершілікті өз мойнына алатынын айтты.

Қырғызстан вакциналау науқанын бастаған Орталық Азиядағы соңғы елдердің бірі. Бірінші болып ақпан айында Қазақстанда, наурыздың ортасында Тәжікстанда вакциналау басталды. Өзбекстанда науқан 1 сәуірден басталады деп күтілуде.

29 наурыздағы жағдай бойынша Қырғызстанда COVID-19 жұқтырудың анықталған жағдайларының жалпы саны 88 мың 163 болды.