Қырғызстанның экс-президенттері Ақаев пен Бақиевқа іздеу жариялады

Қырғызстан ұлттық қауіпсіздік комитеті Құмтөр кенішіндегі жемқорлық ісі бойынша елдің экс-президенттері Асқар Ақаев пен Құрманбек Бақиевқа іздеу жариялады. Бұл туралы 8 шілдеде комитет төрағасы Қамшыбек Ташиев мәлімдеді.

Бұл туралы Orda.kz centralasian.org сайтына сілтеме жасай отырып хабарлайды.

Қырғызстанда Құмтөр ісі бойынша қылмыстық іс бірнеше кезеңге бөлініп, тергеліп жатыр. Ташиев Асқар Ақаев президент болып тұрған тұста канадалық компаниямен келісім-шарт жасасқанда заң бұзылғанын айтты. Бішкек ресми түрде Ақаевқа жемқорлық күдігімен іздеу жариялады.

Негізгі айып бойынша, 2003 жылы келісім-шарт жасасқанда канадалық компанияның Қырғызстандағы үлесі 25,7 пайызға төмендетіліп көрсетілген. Сондай-ақ, 2009 жылы елдің экс-президенті Құрманбек Бақиев пен оның ұлы Максим Бақиевқа іздеу жарияланған еді. Олар да жемқорлық күдігіне ілінген.

Елдің бұрынғы президенттері Ақаев пен Бақиев 2005 және 2010 жылғы революциядан кейін елден қашқан. Ақаев Мәскеуде, Бақиев Минскіде тұрып жатыр. Айта кетейік, екеуі де Қырғызстанда сырттай сотталған.

«Құмтөр» – Қырғызстанның ең ірі алтын кеніші, оны канадалық Centerra Gold Inc. компаниясы игеріп жатыр, Қырғызстанның ондағы үлесі – 26 пайыз.

Қырғызстанның қазіргі билігі экс-президенттер, шенеуніктер жемқорлыққа барып, компаниямен тиімсіз келісім-шарттар жасасқан деп санайды. Қазір Қырғызстанда бұл іс бойынша бұрынғы премьерлер, депутаттар, министрлер күдікке ілінген.