Қырғызстан Украинаға қарсы соғыста Ресейді қолдады

Қырғызстан президенті Садыр Жапаров Ресей президенті Владимир Путинмен телефон арқылы сөйлесіп, Ресей Федерациясының Донбастың бейбіт тұрғындарын қорғау жөніндегі іс-әрекетін қолдайтынын білдірді.

Бұл туралы Кремльдің баспасөз қызметі хабарлады.

«Садыр Жапаров Минск келісімдерінің орындалмағанына Киевтің жауапкершілігін атап өтіп, Ресейдің Донбастағы бейбіт тұрғындарды қорғау жөніндегі шешімді әрекеттерін қолдайтынын білдірді» делінген хабарламада.

Сонымен қатар, екі ел басшысы Украинадағы жағдайды талқылай келе, Ресей-Қырғызстан стратегиялық серіктестік пен одақтастық қатынастарын жан-жақты нығайтудағы өзара ниеттестіктерін білдірді. Путин Жапаровқа берік ұстанымы үшін алғыс айтты.

Еске салсақ, Ресей президенті Владимир Путин Донбас республикалары басшыларының үндеуіне жауап ретінде арнайы әскери операция жүргізу туралы шешім қабылдап, Украинаға қарсы соғыс жариялады. Ресей басшысы Мәскеу жоспарында Украина аумақтарын басып алу жоқ екенін баса айтты.