Қырғызстан дәрігерлері қытайлық вакцина салдырғысы келмейді

Қырғызстандағы дәрігерлердің көбі ресейлік вакцина салдыртқысы келеді. Олар елге жеткізіліп үлгерген қытайлық вакцинаны салдырғылары келмейді. Қытайлық вакцинадан бас тартқандар мен оның себебі жөнінде толық мәлімет вакциналау басталғаннан кейін белгілі болады.

Бұл туралы Қырғызстан денсаулық сақтау және әлеуметтік даму министрлігінің өкілі, эпидемиолог-иммунолог Бурул Асыкбекова Азаттықтың Қырғыз қызметіне берген сұхбатында айтқан.

— Ұлттық жоспарға сәйкес, біз кімге вакцина салынатынын анықтап алуымыз керек. Коронавируспен ауырып шыққан медиктер арасында бас тартып жатқандар көп. Қазір интернетте түрлі ақпарат шығып жатыр, соның бәрін оқиды. Көбі ресейлік вакцинаны салдыртқысы келеді, - деген Асыкбекова.

Қырғызстанда 29 наурыздана бастап тұрғындарға коронавирусқа қарсы вакцина егіле бастайды. Қырғызстанға қытайлық Sinopharm компаниясының коронавирусқа қарсы вакцинасының 150 мың дозасы жеткізілген. Бұл 75 мың адамды вакциналауға жетеді.

Бірінші кезекте коронавирус жұққандарды емдейтін медицина қызметкерлері, жедел жәрдем қызметкерлері, сонымен бірге білім беру мекемелері және құқық қорғау орган өкілдеріне екпе салынады. Вакцина құжаттарын Қырғызстанның арнайы сарапшылар тобы әлі мақұлдамаған.

Қырғызстанда соңғы мәлімет бойынша, 87 мыңнан астам адамға коронавирус жұққан. Елде күн сайын орташа есеппен 100 науқас тіркеледі. Індет басталғалы бері 1494 адам коронавирустан қайтыс болған. Былтыр наурыздан бері 4229 медицина қызметкеріне вирус жұққан, 4,1 мыңы жазылған.