Қырғызстанға 960 тонна жанармайды газ атауымен экспорттамақ болған

Газ конденсаты деген желеумен Түркістан облысынан 960 тонна бензин жөнелтілмек болған. Бұл туралы Қазақстан Республикасы Қаржы мониторингі агенттігі (ҚМА) хабарлады.

 «Қаржы мониторингі агенттігінің Түркістан облысы бойынша аумақтық департаменті Манкент теміржол вокзалында «Баррель»  деп аталған жедел-іздестіру іс-шаралары барысында Қазақстаннан Қырғыз Республикасына 960 тонна АИ-92 маркалы бензинді заңсыз әкетудің жолын кесті», - делінген агенттік хабарламасында.

Тергеу барысында жанар-жағар майларды газ конденсаты деген желеумен теміржол цистерналарында тасымалдау жоспарланғаны анықталды. Бензиннің жалпы құны 229 млн теңге болады.

«Баррель»  профилактикалық іс-шарасы барысында қылмыстың жолы кесілді.

Тергеу жалғасуда, тергеу мүддесіне сай басқа ақпарат жария етілмейді, деп қосты ҚМА.

Мұнай өнімдерін Шымкентке және Түркістан облысына жөнелту мәселесін зауыт басшылығы бақылауға алды.

8 желтоқсандағы жағдай бойынша Түркістан облысындағы мұнай базаларында АИ-92 маркалы бензиннің 15,4 мың тоннасы бар. Бұл 12 күндік тұтынуға жеткілікті.

Мұнай өңдеу зауыты Түркістандағы жанармай құю бекетінде бір-екі күннен бері жанармай тапшылығы орын алғаны туралы  хабарлады. Бензин тек талонмен беріледі.

Қазақстанда дизель отынының қымбаттауы байқалады. Жетіспеушілік туралы әуе компаниялары да хабарлаған болатын.