Үндістан мен Пәкістан қақтығысы шиеленісе түсті

Сейсенбіден сәрсенбіге қараған түні Үндістан Пәкістан мен Кашмирдің пәкістандық бөлігіне шабуыл жасап, кемінде сегіз адам қаза тапты. Пәкістан бұл шабуылды «әдейі жасалған шабуыл» деп атады, деп хабарлайды Orda.kz Reuters агенттігіне сілтеме жасай отырып.

Үндістан Қорғаныс министрлігінің мәлімдеуінше, Үндістан қарулы күштері «Синдур» операциясын бастады.

«Пәкістан басып алған Джамму мен Кашмирдегі лаңкестік инфрақұрылымға шабуыл жасалды, ол жерден Үндістанға қарсы лаңкестік шабуылдар жоспарланып, бағытталуда» деп жазылған мәлімдемеде.

ВВС Пәкістан армиясының соққылар террористерге емес, жай халық тұратын аудандарға келіп түскені туралы мәлімдемесін келтіреді. 

 Оның айтуынша, үнді ұшақтары өздерінің әуе кеңістігінен зымырандар ұшырған. Ал Үндістаннан болған соққы нәтижесінде сегіз адам қаза тауып, 35 адам жарақат алды, екеуі хабар-ошарсыз кетті. Бір соққы мешітті қиратты.

Бейне: «Әлемдегі наразылықтар» телеграм-арнасы.

Пәкістан үстімен өтетін әуе кеңістігі 48 сағатқа жабылды.

SAMAA TV телеарнасы Пәкістан Үндістан аумағындағы нысаналарға қарсы шабуыл жасағанын хабарлайды.

Екі тараптың да ядролық қаруы бар. БҰҰ Бас хатшысы Антониу Гутерриш екі елді де барынша әскери ұстамдылыққа шақырды.

Бейне: «Әлемдегі наразылықтар» телеграм-арнасы.

 Қақтығыс 22 сәуірде танымал таудағы Пахалгам курорты маңында болған терактіден кейін шиеленіскен, онда қарулы адамдар бір топ туристке оқ атқан. 

26 адам, соның ішінде 25 Үндістан азаматы мен бір Непал азаматы қаза тапты. Үндістан бұған Пәкістан жауынгерлері жауапты екенін мәлімдеді, бірақ Пәкістан оған қатыстылығын жоққа шығарды.