Қымбат Досжан «Балапан» арнасының директоры болды

Танымал тележүргізуші, журналист Қымбат Досжан «Балапан» телеарнасының директоры қызметіне тағайындалды.

Бұл туралы ең алдымен Қымбат Досжанның әріптесі, депутат Дана Нұржігіт хабарлады. Ол балалар арнасының басшылығына  саланы жақсы білетін  маманның келгеніне қуанды.

— Телевизиядағы ғұмыры көрермендер көз алдында өтіп жатқан білікті маманның өз саласында жетекші қызметке келіп жатқаны көңілге қонарлық, құптарлық бастама.

Сіз білетін, біз білетін Қымбат Досжан бүгіннен бастап «Balapan» арнасының директоры қызметіне тағайындалды. Құттықтаймын! ТВ саласына студенттік кезден араласқан @kymbatdoszhan жанкештілігін,ісіне адалдығын көріп өстік.

Екі ұлын өзі өсіріп, өмірдің қиындығын да аз көрген жоқ. Бірақ экранның арғы жағындағы халықтың сұранысын, көңілін, сенімін Қымбат қашан да бәрінен биік қояды.

Ұрпақ тәрбиесі – қоғам алдындағы жауапкершілік. Осыны терең түсінетін адамның балалар арнасының басшылығына келгені қуантады. Балалар Қымбат апасынан көөөп сыйлық күтеді, – деп жазды ол Instagram-дағы парақшасында.

Бұған дейін бұл арнаны Мақпал Жұмабай басқарған. Ол да кино және телевизия  саласының маманы. Мақпал Жұмабай бұл қызметке 2018 жылдың 2 ақпанында тағайындалған болатын.