Қылмыстық топ Атыраудағы төлем жүйесінен 11 млн теңге жымқырған

Атырау облысы полиция департаменті криминалды полиция басқармасы қызметкерлері өңірде ірі көлемде қаражат жымқырған ұйымдасқан қылмыстық топты ұстады.

Бұл туралы Orda.kz  порталы Polisia.kz-ке сілтеп хабарлады.

Мекеменің қауіпсіздік қызметкері полиция қызметкерлеріне хабарлама берген. Тәртіп сақшылары дереу жедел тексеру ұйымдастырып, нәтижесінде қылмыскерлердің аталған мекемеде бұрын қызмет атқарғандарын анықтады.

Олардың бірі осы күнге дейін сол жерде жұмыс істеп, мәліметтермен бөлісіп отырған. Тінту кезінде 31 жастағы ер адамның үйінен алты төлем терминалы, компьютерлер мен қосымша құрылғылар табылып, тәркіленді. Қылмыскерлердің бірі төлем жүйесіне кіру парольдерін тауып беріп отырған, ал біреуі ұрланған ақшаларды өзара бөлумен айналысқан.

— 2021 жылдың 21 наурызынан бастап шілденің 4-іне дейінгі уақытта белгісіз тұлғалар төлем жүйесіне заңсыз қол жеткізу жолымен 11 170 000 теңге ұрлаған, – дейді Атырау облысы полиция департаментінің бастығы Қамза Үмбетқалиев.

Алты адамдық топ қылмыстық әрекеттерін үш ай бойы іске асырып келген. Қазіргі уақытта 26-31 жас аралығындағы 6 күдіктіге қатысты қылмыстық кодекстің 188-бабы 4-бөлігі 3-тармағымен сотқа дейінгі тергеу амалдары жүргізілуде. Күдіктілер кінәларын толықтай мойындап, уақытша ұстау абақтысына қамауға алынды.