Қылмыскерлерге рақымшылық беру елдегі тыныштықты бұзбай ма? - депутат сауалы

Мәжілісте Ішкі істер министрі Ерлан Тұрғымбаев Қазақстан Тәуелсіздігінің 30 жылдығына байланысты рақымшылық елдегі қылмыстың өсуіне әкеп соқтыруы мүмкін бе деген сауалға жауап берді.

Бұл туралы Orda.kz хабарлады.

Бұл сұрақты «Қазақстан Республикасы Тәуелсіздігінің 30 жылдығына байланысты рақымшылық жасау туралы» заң жобасын талқылау барысында депутат Әмірхан Рахымжанов көтерді.

– Рақымшылық Қазақстандағы қылмыстың өсуіне қалай әсер етеді деген қоғамдағы белгілі бір үрейлерге назар аудармауға болмайды. Айтыңызшы, рақымшылық бойынша сотталғандардың босатылуы қылмыс деңгейінің артуына әкеп соқтырмай ма? Бостандыққа шыққандар тағы да заң бұзбай ма? Осы бағытта полиция тарапынан қандай шаралар жоспарлануда? - деп сауал қойды депутат.

Ерлан Тұрғымбаев ауырлығы орташа және аса ауыр емес қылмыстар үшін сотталғандар рақымшылыққа ілінетінін айтты.

– Бостандыққа шыққаннан кейін бізде пробация қызметі, учаскелік полиция қызметкерлері - бұл адамдардың барлығы профилактикадан өтеді. Екіншіден, олар жұмыс табады. Құқықбұзушылық болса, заңда нормалар қарастырылған, олар, әрине, жауапқа тартылады, - деп түйіндеді министр.

Бұған дейін Ішкі істер министрлігінің басшысы Қазақстан Тәуелсіздігінің 30 жылдығына орай рақымшылық кімге түсетінін айтқан болатын.