Үкімет бюджеттегі триллион теңге тапшылығын қалай өтемек?

Үкімет Қазақстан бюджетіндегі триллион теңгелік «тесікті» салық есебінен жабуды жоспарлап отыр, деп хабарлайды Orda.kz. Бұл туралы ұлттық экономика министрі Нұрлан Байбазаров мәлімдеді.

«Нарықтың өзгеруі, импорт пен экспортқа байланысты қиындықтар, сонымен қатар металл бағасының төмендеуі бюджетке әсер етті. Биыл біз шамамен 1 триллион теңге көлемінде қосылған құн салығын (ҚҚС) қайтардық, оның ішінде 590 миллиард теңге өткен жылдағы қарыздарды жабуға кетті. ҚҚС-ты қайтармай кәсіпорындар жұмысын жалғастыра алмайды, бұл олардың айналым капиталына тікелей әсер етеді және іскерлік белсенділікті қолдайды. Яғни, бұл біздің экономикаға құйылған триллион теңгенің маңыздылығын көрсетеді», – деді Байбазаров.

Министрдің айтуынша, үкімет салықтық әкімшілендіруді күшейтіп, цифрландыруды қолдана отырып, бюджет тапшылығын жоюды көздеп отыр.

«Биыл салықтық әкімшілендіру арқылы қосымша 900 миллиард теңге табыс табамыз деп жоспарлап отырмыз. Бұл ҚҚС өтеуге жұмсалған шығындарды жабуға жеткілікті болады», – деді ол.