«Үй сатып алу мен сату саны 40 мыңға жетті»: Қай өңірде тұрғын үй қымбат?

2024 жылдың шілде айында тұрғын үйді сатып алу-сату мәмілелерінің саны 40 099-ға жетті.

Бұл туралы ҚР стратегиялық жоспарлау және реформалар агенттігі хабарлады.

40 099 деген көрсеткіш алдыңғы аймен салыстырғанда 21,7%-ға артық. Әсіресе, ел астанасы – Астанада мәмілелер санының 42,2%-ға өскені байқалды. Сондай-ақ, Алматы және Ұлытау облыстарында 33,8% және 33,6%-ға сатып алу және сату көбейді.

Бағалар өсіп жатыр

Бір жыл ішінде, яғни, 2023 жылдың шілдесінен 2024 жылдың шілдесіне дейін екінші нарықтағы тұрғын үйдің бағасы 3,2%-ға, ал бастапқы нарықта 2,4%-ға өсті. Жайлы тұрғын үйдің жалдау ақысы да 5,2%-ға өсті, бұл елдегі тұрғын үйге деген сұраныстың тұрақты өсіп жатқанын көрсетеді.

Тұрғын үйлер қымбаттаған өңірлер

Жаңа тұрғын үйдің бағасы шарықтап тұрған қалалар қатарында Ақтөбе (+7,5%), Талдықорған (+7,2%) және Қызылорда (+7,1%) бар. Екінші нарықта Атырау (+16,9%) мен Астана (+8,9%) көш бастап тұр, ал жалдау саласында Талдықорған (+28,1%), Жезқазған (+23,6%), Петропавл (+21,8%) және Атырау (+21%) алдыңғы қатарда.

Үй сату мәмілелері

Көпқабатты үйлерді сату бойынша 30 973 мәміле тіркелді. Бұл жалпы санның 77,2%-ын құрайды. Ең көп пәтер мәмілелері Астана (21,6%) және Алматы (21,2%) қалаларында жасалған. Жеке үйлер бойынша да мәмілелер санының өсуі байқалады. Әсіресе Алматы және Ұлытау облыстарында көп.