«Үй кезегіндегі 21 мың адам»: Шенеунік әйеліне қызметтік пәтер сыйлады

Оралда мемлекеттік тұрғын үй қорынан пәтер беру мәселесі бойынша дау шықты. 2023 жылдың 13 шілдесінде Альмира Қарасаеваның Строитель микроауданындағы 39/3 мекенжайында орналасқан бір бөлмелі пәтерді алу жайлы өтініші 6 күнде қаралды. Ол әділет басқармасының қызметкері, әрі сол уақытта ТКШ секторын басқарған Әлихан Мыңжасаровпен ерлі-зайыпты екені анықталды.

Бұл туралы «Орал апталығы» хабарлады.

Әдетте үй алу үшін азаматтар бірнеше ай бойы жүреді. Ресми мәліметтерге сәйкес, қазір Оралда тұрғын үй кезегінде 21 мыңнан астам адам тұр. Соның ішінде әлеуметтік жағдайы төмен адамдар, көпбалалы отбасылар мен балалар үйі тәрбиеленушілері де бар.

Ал Альмира Қарасаеваның өтініші 6 күнде – 2023 жылдың 19 шілдесінде қаралды. Өтінішке сол кездегі ТКШ бөлімінің жетекшісі Азамат Халелов қол қойды. Келісімді Әкімнің орынбасары Жандос Дүйсенғалиев бекітті. Өтінішті орындаушы сол уақытта ТКШ секторын басқарып отырған Әлихан Мыңжасаров болған, ол Альмира Қарасаеваның заңды жұбайы еді. Ол өтінішке өзінің жұбайы жайлы ақпарат қоспапты.

Альмира Қарасаева қазіргі уақытта Әлихан Мыңжасаровпен ажырасқанын хабарлады.

Еске сала кетейік, нарықта пәтердің бағасы 13,5 миллион теңгеден жоғары бағаланады.