Украинадағы қантөгісті тоқтату қажет – Ердоған

Астана қаласында Азиядағы өзара ықпалдастық және сенім шаралары жөніндегі кеңестің VI саммиті өтті. Түркия басшысы Украинадағы дағдарыс жаһандық деңгейде кері әсер бергенін айтып, соғыста жеңімпаз болмайтынын ескертті.

– Біз Украинадағы дағдарыстың салдарын аймақтық және жаһандық деңгейде көріп отырмыз. Мен әрқашан әділдікке дипломатия арқылы қол жеткізуге болады деп айтамын. Соғыста жеңімпаз болмайды, әділдіктен ешкім жеңілмейді , – деді Түркия президенті.

Ердоған Түркия мен БҰҰ-ның соғыстың жағымсыз салдарын жою жөніндегі күш-жігері бүкіл әлемде мойындалғанын айтты.

Түркия басшысы Қара теңіз арқылы украин астығын экспорттау туралы Ыстамбұл келісімі және тұтқындармен алмасу айтарлықтай жетістік деп мәлімдеді.

– Біздің мақсатымыз – барлық қиындықтарға қарамастан қантөгісті мүмкіндігінше тезірек тоқтату, – деді Режеп Тайып Ердоған.