Украина Жоғарғы сотының басшысы пара алу кезінде ұсталды

Украина Жоғарғы сотының басшысы Всеволод Князев 3 миллион долларға жуық пара алу кезінде ұсталды.

Украина президенті кеңсесі жетекшісінің кеңесшісі Сергей Лещенконың айтуынша, пара сомасы 2,7 миллион доллар болған.

«Украинаның Сыбайлас жемқорлыққа қарсы ұлттық бюросы мен Сыбайлас жемқорлыққа қарсы мамандандырылған прокуратурасы «Украина Жоғарғы сотындағы ауқымды сыбайлас жемқорлықты, атап айтқанда, Жоғарғы Сот басшылығы мен судьяларының заңсыз пайда алу схемасын әшкереледі» деп хабарлады сот.

«Страна» басылымының дереккөздері Всеволод Князевтің миллиардер әрі Жоғарғы Раданың бұрынғы депутаты Константин Жевагодан пара алғанын алға тартады. Украина билігі оның «Қаржы және несие» банкінің банкротқа ұшырауын тексеріп, Франциядан келген кәсіпкерді экстрадициялауды сұрап жатыр.

«Страна» басылымы қазір Украина Жоғарғы сотының 18 судьясына тінту жүргізіліп жатқанын хабарлады.