Владимир Жириновский қайтыс болды - Ресейлік БАҚ

ЛДПР партиясының жетекшісі және ресейлік танымал саясаткер «Владимир Жириновский бүгін сағат 10:45-те Мәскеудегі ауруханада қайтыс болды» деген ақпарат ресейлік БАҚ беттерінде және желіде желдей есті.

Алайда, Мемлекеттік Дума төрағасы Вячеслав Володин бұл ақпаратты жоққа шығарды.

«Жағдайы шынымен ауыр. Бүгін томографиядан өтті. Біз оны уайымдап жатырмыз, дәрігерлер ол үшін күресіп жатыр. Өзі де керемет азамат. Тез сауығып кетуіне тілектеспіз» деді ол.

Еске салсақ, 9 ақпанда 75 жастағы Жириновскийдің коронавируспен ауруханаға түскені белгілі болды. Бастапқыда оның жағдайы тұрақты болса, артынша түрлі асқынулар анықталған.

Айта кетсек, бұған дейін Либералдық-демократиялық партияның жетекшісі COVID-19-ға қарсы сегіз рет екпе алған болатын. Соңғы күндері саясаткер комада жатыр деген ақпарат тараған еді

Жириновский 1946 жылы 25 сәуірде Алматыда дүниеге келген. 1964 жылы 3 шілдеде ол Қазақстаннан көшіп кеткен. Владимир Вольфович өзінің сұхбаттарында және көпшілік алдында сөйлеген сөздерінде Қазақстан және Қазақстан халқы туралы өте екіұшты мәлімдемелер жасайтын.