Владимир Путин 21 қыркүйектен бастап жартылай жұмылдыру туралы жариялады

Ресей президенті Владимир Путин 21 қыркүйектен бастап жартылай жұмылдыру туралы жариялады.

Әскери қызметке тек запастағы және қарулы күштер қатарында қызмет еткен, белгілі бір мамандықтары мен тиісті тәжірибесі бар азаматтар ғана шақырылады.

— Әскерге шақырылғандар міндетті оқудан өтеді. Еріктілердің мәртебесі қаралады. Еліміз бен халқымызды қорғау үшін біз қолымыздағы барлық мүмкіндіктерді пайдаланамыз. Ресей референдумды қауіпсіз өткізу үшін барлық жағдайды жасайды,- деді Путин.

Сондай-ақ, Ресей президенті Батыс елдері Киевті әскери операцияларды Ресей аумағына көшіруге итермелеп жатқанына сенім білдірді.

— Батыст елдерінің мақсаты - Ресейді әлсірету, бөлшектеу және жою, осылайша ол көптеген соғысушы аймақтарға бөлініп кетеді,- деді Путин.

Ол жұмылдыру кезінде қатардан кімдер кетуге рұқсат алатынын айтты.

— Ішінара жұмылдыру кезеңінде жасына, денсаулығына және соттың бас бостандығынан айыру үкімі бойынша әскери қызметтен босатылуы мүмкін,- деді Ресей президенті.