Владимир Путин НАТО-ға талап қойды

Бүгін Ресей президенті Владимир Путин баспасөз мәслихатын өткізді. Бұл жиында түрлі мәселелер қозғалды.

Sky News журналистінің сұрағына жауап берген Ресей президенті «Батыс елдерінің әрекеті келіссөздер барысына емес, Ресейдің қауіпсіздігін қамтамасыз етуге байланысты болады» деді.

– Бұл жерде не түсініксіз? Біз Америка Құрама Штаттарының шекарасына жақын жерде зымырандар орналастырып жатырмыз ба? Жоқ. Керісінше, Америка Құрама Штаттары біздің елдің босағасына зымырандарын тасып жатыр. Ел іргесіне қарулы күштерді әкелуді доғарыңдар деген талап орынсыз ба? – деді Путин.

Ресей президенті елі үшін келіссөздердің барысы емес, нәтижесі маңызды екенін атап өтті.

– Сіздер менен кейбір кепілдіктерді талап етесіздер. Сіздер бізге кепілдік беруіңіз керек. Шұғыл түрде. Келіссөздерді ондаған жылға созудың еш қажеті жоқ, - деді Ресей басшысы.