Владимир Божко «қазақ ұлтшылдарына» қыр көрсететін жазбамен бөлісті

Мәжіліс депутаты Владимир Божко өзінің Facebook парақшасында «қазақ ұлтшылдарына» қыр көрсеткен жазбамен бөлісті. Жазбада батысшыл, тұраншыл және украинаға бүйрегі бұратын адамдарды бір ауыз сөзбен «ұлтшыл» деп атаған. Жазба авторы – Семен Уралов.

«Қазақстанның ұлтшылдары әзірлене беріңдер.

Ресейдің Бас прокуроры Игорь Краснов Қазақстанның Бас прокуроры Берік Асыловпен кездесті: «Бұл туралы айту ыңғайсыздау. Бірақ маған ұдайы мынадай ақпарат түседі: «Украиндық үкіметтік емес ұйымдардың қолдауымен Қазақстанда да белсенді түрде русофобтық әрекет жасалып жатыр»...

«Экстремизм мен терроризмге қарсы тұру  тәжірибесімен алмасуға біздің сарапшыларымыз шілде айында Нұр-Сұлтанға келеді».

Жақында барлық соросшылар, тұраншылар мен басқа да нацистерге қылбұрау салынады деген үміт бар.

Бірқатар қазақ саясаттанушыларына жазбаларын барынша тазартып, бұдан былай қайдағы жоқ нәрсені жазбауға кеңес беремін» делінген Семен Ураловтың жазбасында.

Семен Ураловтың жазбасымен депутат Божко өз парақшасында бөліскен. Ол желіде қызу талқыға түскен сәтте депутат жазбаны өшірмей, оны жұрт көзінен бұғаттап қойған.

Божконың айтуынша, бұл Украинаның арнайы қызметінің арандатуын тоқтату үшін қажет. Сондай-ақ, ол жұрттың неге сонша дүрліккенін түсінбейтінін жеткізді.