Вячеслав Ким «Самұрық-Қазына» АҚ директорлар кеңесі қызметінен кетті

Вячеслав Ким «Самұрық-Қазына» Ұлттық әл-ауқат қоры» АҚ директорлар кеңесінің құрамынан шығарылды. Бұл туралы ақпарат KASE сайтында жарияланды.

– Қазақстан қор биржасының (KASE) сайтындағы хабарламаға сүйенсек, кеңестен өз бастамасы бойынша Директорлар кеңесінің мүшесі В.К.Ким шығарылған. Енгізілген өзгерістерді ескере отырып, «Самұрық-Қазына» Ұлттық әл-ауқат қоры» АҚ Директорлар кеңесі алты адамнан тұрады: Джон Дудас, Онг Бун Хви, Лука Сутера, Сәтқалиев А.М., Акишев Д.Т., Қуантыров А.С,- делінген хабарламада.

Вячеслав Ким - Kaspi.kz-тің тең құрылтайшысы, акционері және директорлар кеңесінің төрағасы, компанияның 24,13% акциясына иелік етеді, Қазақстан Ұлттық таэквондо федерациясының президенті. Ол Қазақстандағы ең беделді және ауқатты бес кәсіпкердің бірі.

2013 жылдан бастап Kolesa Group компаниясының ортақ иесі болды. 2015 жылдан – Alseco компаниясының тең иесі. 2017 жылдан 2019 жылға дейін – Magnum сауда желісінің тең иесі.

Бұған дейін Kaspi.kz және компанияның тең құрылтайшылары Вячеслав Ким мен Михаил Ломтадзе «Қазақстан халқына» қорына 10 миллиард теңге аударған болатын.